Bus

NAKAKATUWA talaga minsan ang mga eksena sa bus. Gaya nitong isang araw, habang nakaupo ako sa window seat sa first row sa likuran ng driver, may katabi akong teenage woman na kinairitahan ko dahil ayaw umusog at umupo nang maayos. Sa simula pa nga, wala siyang care sa hitsura niya, sloppy ang pagkakaupo niya at parang lost sa sariling mundo.

Ang kaso, may lalaking umupo sa tabi niya. Hindi naman cute ang lalaki pero umayos ng upo ang hitad.

“San punta mo?” opening line ng lalaki.

Pa-sweet ang girl. “Ha?”

“San ka bababa?” tanong ulit ng lalaki. Nag-usap na ang dalawa. Actually, kahit panay ang eavesdrop ko eh hindi ko marinig masyado kung anong pinag-uusapan ng dalawa. Basta, exchanging personal information, gaya ng san ang probinsiya nila, ilang taon na, etcetera, etcetera.

“Ano bang pangalan mo?” susog ulit ng lalaki.

Patuloy ang pagpapa-sweet.

“Ah…V.”

“Anong V? Victoria? Vicky?”

“Basta V,” pagmamaganda ng babae.

Pigil na pigil ang tawa ko sa nagaganap na conversation sa tagiliran ko.

“May number ka ba?” Napalingon ako sa kanila. Aba ang hitad, sinusulat na ang number niya sa palad ng lalaki.

Tinignan ng lalaki ang number at nagtanong, “Wala ka bang Sun?”

“Meron.”

“Eh bakit hindi ‘yun ang binigay mo sa kin?”

“Eh hindi ko naman laging ginagamit eh,” pa-sweet ang boses ng girl.

Hindi na rin nakatiis ang driver na, sa gitna ng traffic, eh nauulinigan din pala ang conversation ng dalawa.

“Ang bilis mo, ‘toy ah!” Mapangbuska ang ngiti ng driver. Obvious na nahiya ang babae dahil hininaan niya lalo ang boses niya sa pakikipag-usap sa lalaki. Pero kailangan nang bumaba ng lalaki sa bus at nagpaalam na sila. Pero pagkababang-pagkababa ng lalaki, kinuha agad ng girlash ang compact mirror sa bag, tinignan ang hitsura, nag-ayos ayos at, aba, nag-lipstick pa.

Ngiting ngiti na talaga ako. Kung hindi ako tatawa baka mautot ako sa kakapigil ng tawa. Kailangan kong humanap ng props kaya kinuha ko na lang ang cellphone ko at itinext ko sa friend ko kung anong nagaganap sa tabi ko. Sumagot ang friend ko, “Dpt sumngit k. Dpt tnanong mo, ‘Xcuse me, bt wats d meaning of ds?’” Tumawa na talaga ako nang malakas.

Lalong na-conscious ang babae. Habang ngiting ngiti akong nagte-text sa kaibigan ko, aba halos mag-lean na ang hitad sa akin para masilip kung siya ba ang pinag-uusapan namin sa text ng friend ko. Lalo kong itinalikod sa kanya ang cellphone at may pagkamalditang nag-text nang nag-text habang nakangiti. Obvious na irita ang babae sa akin hanggang sa bumaba na siya sa bus.

Ang lesson? Always sit properly.

Mood: Masarap magpapak ng Milo.